વધતા પ્રદૂષણને જોતા દિલ્હી સરકારે મોટો નિર્ણય લીધો છે. અરવિંદ કેજરીવાલ સરકારે તમામ ખાનગી અને સરકારી શાળાઓને બે દિવસ માટે બંધ રાખવાનો નિર્ણય કર્યો છે. મુખ્યમંત્રી કેજરીવાલે સોશિયલ મીડિયા X (અગાઉ ટ્વિટર) પર પોસ્ટ કરીને આ માહિતી આપી છે.
પ્રાથમિક સ્તરની તમામ શાળાઓ રહેશે બંધ
તમને જણાવી દઈએ કે ગુરુવારે સવારથી દિલ્હી-NCRમાં આકાશમાં ધુમ્મસ છવાયું હતું. દિલ્હીમાં હવાની ગુણવત્તા 450ના આંકને પાર કરી ગઈ છે. નોઈડામાં પણ આવી જ સ્થિતિ છે. લોકોને શ્વાસ લેવો મુશ્કેલ બન્યો છે. વધતા પ્રદૂષણને ધ્યાનમાં રાખીને સૌપ્રથમ દિલ્હી-એનસીઆરમાં ગ્રેપ-3 પ્રતિબંધ લાગુ કરવામાં આવ્યો હતો.
વર્ગો ચાલશે ઓનલાઈન મોડમાં
દિલ્હી શિક્ષણ નિયામકની કચેરી દ્વારા જણાવવામાં આવ્યું છે કે, તમામ પ્રી-સ્કૂલ, પ્રી-પ્રાઈમરી અને પ્રાઈમરી વર્ગો (નર્સરીથી ધોરણ પાંચ)ને 3 અને 4 નવેમ્બરે બંધ રાખવાનો આદેશ આપવામાં આવ્યો છે. આ સમયગાળા દરમિયાન MCD શાળાઓ પણ 03 અને 04 નવેમ્બરે બંધ રહેશે. વિદ્યાર્થીઓ માટેના વર્ગો ઓનલાઈન મોડમાં ચલાવવામાં આવશે. જો કે શિક્ષકો અને કર્મચારીઓ માટે શાળાઓ ખુલ્લી રહેશે.
