બિહારમાં ભાજપની સાથે સરકાર બનાવ્યા બાદ નીતિશ કુમારનું વલણ પણ બદલાયું હોય તેવું લાગી રહ્યું છે. હવે નવી એનડીએ સરકાર રાજ્યમાં ગુના, ભ્રષ્ટાચાર અને માફિયા શાસનનો સામનો કરવા માટે ઉત્તર પ્રદેશની તર્જ પર તૈયારી કરી રહી છે.
યુપીમાં ગેંગસ્ટર એક્ટની તર્જ પર હવે બિહારમાં ગુનાખોરી અને ભ્રષ્ટાચાર તેમજ માફિયા શાસનને ખતમ કરવા માટે કડક કાયદો બનવા જઈ રહ્યો છે.આ સંદર્ભમાં મંગળવારે સાંજે નીતિશ કેબિનેટની બેઠક યોજાઈ હતી. આ બેઠકમાં નવા કાયદાના ડ્રાફ્ટને મંજૂરી આપવામાં આવી છે. હવે તેને વિધાનસભાના વર્તમાન સત્રમાં બિલ તરીકે રજૂ કરવામાં આવશે. આ નવા કાયદાના અમલ બાદ ભ્રષ્ટાચાર અંગે સરકારની કડકાઈ વધુ વધશે. રાજ્યના સરકારી વિભાગોમાં થતી ગેરરીતિઓ ઉપરાંત માફિયાઓના રાજને ડામવા માટે સરકાર નવો કાયદો લાવવાની તૈયારી કરી રહી છે.
આ નવો કાયદો અમલમાં આવ્યા બાદ ભ્રષ્ટાચારને ગંભીર અપરાધ તરીકે વર્ગીકૃત કરવામાં આવશે અને કડક સજાની જોગવાઈ હશે. મુખ્યમંત્રી નીતિશ કુમારની અધ્યક્ષતામાં મંગળવારે સાંજે મળેલી કેબિનેટની બેઠકમાં ભ્રષ્ટાચાર અને માફિયા શાસન પર કડક કાર્યવાહી માટે લાવવામાં આવનાર કાયદાના ડ્રાફ્ટને મંજૂરી આપવામાં આવી હતી. સરકારી ભંડોળની ઉચાપત કરનારાઓ માટે કડક સજાની જોગવાઈ છે.
આ સાથે જમીન માફિયા, રેતી માફિયા અને દારૂ માફિયાઓ સામે પણ કાયદા દ્વારા કડક કાર્યવાહી કરવામાં આવશે.બિહારમાં લાગુ થઈ રહેલા આ નવા કાયદાને યુપીના ગેંગસ્ટર એક્ટ જેવો જ માનવામાં આવી રહ્યો છે. અત્યાર સુધી ભ્રષ્ટાચાર અને સિન્ડિકેટ માફિયાઓને લગતા કેસોને ગુનાની ગંભીર શ્રેણીમાં રાખવામાં આવતા ન હતા. તે મામલાઓને ગંભીર ગણીને તેના પર કડક સજા પણ કરવામાં આવશે. મળતી માહિતી મુજબ ભ્રષ્ટાચારને ડામવા માટે બનેલો કાયદો પહેલાના કાયદા કરતા વધુ કડક હશે.
રાજ્યમાં ભ્રષ્ટાચારને નાથવા માટે ત્રણ એજન્સીઓ કામ કરી રહી છે. તેમાં આર્થિક ગુના એકમ, સર્વેલન્સ બ્યુરો અને સ્પેશિયલ સર્વેલન્સ યુનિટનો સમાવેશ થાય છે. આ ત્રણેય એજન્સીઓની સત્તા વધુ વધારી શકાય છે. આ ઉપરાંત નવા કાયદામાં નવી તપાસ એજન્સીનો કોન્સેપ્ટ પણ પ્રસ્તાવિત છે.
