ભાજપના દિગ્ગજ નેતા લાલકૃષ્ણ અડવાણીને 96 વર્ષની વયે ભારત રત્નથી સન્માનિત કરવામાં આવશે. વડાપ્રધાન નરેન્દ્ર મોદીએ સોશિયલ મીડિયા પર આ માહિતી આપી હતી. પૂર્વ વડાપ્રધાન અટલ બિહારી વાજપેયી પછી તેઓ બીજેપીના બીજા નેતા છે, જેમને દેશનું સર્વોચ્ચ નાગરિક સન્માન આપવામાં આવશે. અત્યાર સુધીમાં 49 લોકોને ભારત રત્ન આપવામાં આવ્યો છે. આ સન્માન મેળવનાર અડવાણી 50મા વ્યક્તિત્વ છે.
PM મોદીએ સોશિયલ મીડિયા પર અડવાણી સાથેની પોતાની બે તસવીરો શેર કરી તેમને અભિનંદન પાઠવ્યા હતા. તેમણે લખ્યું- મને જણાવતા ખૂબ જ આનંદ થાય છે કે લાલકૃષ્ણ અડવાણીને ભારત રત્નથી સન્માનિત કરવામાં આવશે.
PM મોદીએ કહ્યું- દેશના વિકાસમાં તેમના યોગદાનને કોઈ ભૂલી શકે નહીં. પીએમે લખ્યું, ‘તે આપણા સમયના સૌથી આદરણીય રાજનેતા છે. દેશના વિકાસમાં તેમના યોગદાનને કોઈ ભૂલી શકે નહીં. તેમણે પાયાના સ્તરેથી કામ શરૂ કર્યું અને દેશના નાયબ વડાપ્રધાન પદ સુધી પહોંચ્યા. તેઓ દેશના ગૃહમંત્રી અને માહિતી અને પ્રસારણ મંત્રી પણ હતા. તેમની સંસદીય કાર્યશૈલી હંમેશા અનુકરણીય રહેશે. ‘સાર્વજનિક જીવનમાં અડવાણીજી દાયકાઓ સુધી પારદર્શિતા અને અખંડિતતા માટે પ્રતિબદ્ધ રહ્યા. તેમણે રાજકીય નીતિશાસ્ત્રમાં એક અનુકરણીય ધોરણ સ્થાપિત કર્યું છે. તેમણે રાષ્ટ્રીય એકતા અને સાંસ્કૃતિક પુનરુત્થાન માટે અભૂતપૂર્વ પ્રયાસો કર્યા છે. તેમને ભારત રત્નથી સન્માનિત કરવી મારા માટે ખૂબ જ ભાવનાત્મક ક્ષણ છે. હું હંમેશા તેને મારું સૌભાગ્ય ગણીશ કે મને તેમની સાથે વાતચીત કરવાની અને તેમની પાસેથી શીખવાની અગણિત તકો મળી.
ભાજપના સ્થાપક સભ્ય, 7મા નાયબ વડાપ્રધાન હતા અડવાણીનો જન્મ 8 નવેમ્બર 1927ના રોજ કરાચીમાં થયો હતો. 2002 અને 2004 ની વચ્ચે, તેઓ અટલ બિહારી વાજપેયીની સરકારમાં 7મા નાયબ વડાપ્રધાન હતા. આ પહેલા તેઓ 1998 થી 2004 દરમિયાન એનડીએ સરકારમાં ગૃહમંત્રી હતા. તેઓ ભાજપના સ્થાપક સભ્યોમાં સામેલ છે.
